andrà tutto bene

Andrà tutto bene hi Italian phrase a ni a, a sapṭawng chun “everything will be alright” ti na a ni a. Ei tulai ṭawng taka hang hril chun, “la ṭha pei ei tih” ti leh a lo inmil hle. La ṭha pei ei tih ti sersuoktu hin Italian phrase hi a lo hriet hiel am a ni aw ka ti deu thawa, a lo hriet zau khawm a ni el thei, a pawi nawh!

2019 Krismas hlimtakin ei hmang zoa, 2020 kum thar ei lawma ei lam dup dup zo sawtnawte khan Eurokuilo thli ni awm takin a mi hung hrut tawl a, khawvel pumpui chu hrilengin a mi hung sawp tawl a. Chu laia an ṭan kum le ṭan hlim a tuor nasa tak chu khawvela health facility le infrastructure nei ṭha pawl taka ngai Italy ram a nih. Italy kha a nguiin a ngui tawp a, khawvelin a thlir tawp el a ni kha maw. Nisienkhawm, hun a hung liem a, hringna lem chu tamtak chân nisienkhawm boruok a hung inâng ve pei taa.

Ngirhmun pangngai tak lem chu la ni chie naw sienkhawm, boruokin zie um tieng a hung pan ṭan pei lai khan “andrà tutto bene” hi mipui hai insukphurna le beiseina hring an inpekna thu pawimaw tak el a hung inchang a nih.

“andrà tutto bene” hi Cantonese phrase “jiayou” ti le khawm an zul hle a. Jiayou ti hi, inthla loin annawleh chel zing rawh, ṭhang fan fan ti inkawk tir thei a nih.

Mihriemin hringnunah ngirhmun le hun chi dang dang ei tuok hlak a, ring reng dam, ei ring der lo dam. Harsatna chi dang dang, a tuortu ta ding chun a nat nep der lo, thlirtu mit a ruok chu danglam le nep em em a inlang khawm a um a, ei tuok an ang naw seng hlak. An ang khawm um a tih. Amiruokchu, hrileng nasatakin Italy ram a nuoi hmat el a chechang thei loa a siema khawvelin a thlir el ta hnung khawma an hung ngir suok nawkna hin mihriem ngirhmun le harsatna dang dang tuok hai ta ding chun beiseina ṭhatak el a siemin an entir niin ka hriet.

2020 kum bul a inthawk vawisun chen hin ei khawvel le ei ram boruok hi a la’n âng thei tak tak naw a. An âng ding ang vanga hung inlangin anleh, a nasa lemin a hung thaw nawk rup a. Tukhawm hin ngai ei la aw naw zing a, vel dang ei la tuok ding khawm niin hril ri mek a ni bawk. Hi hrileng lei hin mihriem tiemseng lo hai ngirhmun chu derthawng takin a siem a, hmatieng hun chiengkuong lo na ngirhmunah a thlak a nih.

Mimal a sin thawna nei hai, sungkuo, khawtlang chen a nghawng siet a. Pansak le panthlang annawleh khawsung mi in hre em em le inngaina em em hlak hai laiah “unau hmelhai” an tlung tir a. Lampuia intuok khawma mit sir a in mel zau zau el thaw ta dam ei um nuol ta ka ring. Tangka le fakzawng harsatna chau a ni nawa, mihriem lungril put le inlaichinna a chen hi hrileng hin nghawng a nei chu a ni ta hi.

Hmelma ni lo ding hai hmelma in a siem a, inhmangai ding hai inhmangai thei loin, ṭhangpui ngai le sawmdawl ṭul hai sawmdawl thei lo ding ngirhmunah a sie ta pei a. Dit thlang ni lo unau hmelhai chu, ei ramah, ei khawtlang ah ei hnawl thei loin a lo tlung ta zing a nih. A va pawi lawm lawm!

Amiruokchu, beiseina a la thi lem…! Khawvela mihriem hai hi beiseina bo der a khawsa ei um naw a. An baua inthawk kei chu beiseina ka nei nawh ti hai khawma beiseina an nei tho a. An hrillang nuom naw khawma an lungrilah beisei le riruongna an siem ngei hlak. Mihriem pangngai lo, ruol ban phak rak naw hai khawma beiseina an nei ve. Beiseina boa mihriem dam hi ei um nawh, beiseina ei nei ta naw chun ei inthuok ta nawh ti na a nih. 

Chu beiseina chun, ni thar lawmum a mi lan tlun ding a nih ti a mi’n ring tir tlat a. Chu chu tamtak damsan a ni hrim bawk. Covid lei kher kher a ni naw khawma tuuhin ei ngirhmun chu inzakum rak khawpa sie a ni el thei, ngirsuok nawk thei dinga inring ta lo hiel ngirhmun a um khawm ei lo ni el thei tah. Nisienkhawm, hun rinum hi a la tawp ding a nih. Harsatna chu la’n kieng ngei a tih. A hun ruok chu ei hrillawk thei nawh. Ringtu ei ni a Pathien a ringna innghat ding ei ni zie chu inhma ruol a ni nawh, ei thaw ding hrim a nih.

Chu le inruol chun ei ngirhmunin zie um tieng a pana khaw êng an lang thei hma po chu - “andrà tutto bene” ti a kam petin “jiayou” ti a ei la thaw hram hram a ṭul. Harsatna hi bo ngai nawng a ta, lawmna leh insawp zing hlak a tih. Mani in thunun thei hi a pawimaw a, in thunun thei lo ring naw tuhaiin an ning intel luotin an hringna an lak hlak. Nisienkhawm, chu chu harsat pumpelna a lo ni ngai nawh.

Harsatna pawm thiem a ṭul a, lunginuoi taka ṭhang a ngai hlak bawk. Philip Yancey lekhabu “Natna ei tuor lai hin Pathien khawlam a um a?” (Where is God when it hurts?) ti a zieknaa bung pakhata mi le hi thusep inzul deu a um a, a ziektu hisapna a ni chie am chu ka hriet naw lai zingin hermilin a kharna in hmang ka tih.

“Khawvel chanchin hi a ni dan ding ang takin tlungkim phawt raw seh. Perkhuong rem a ni hmain a hrui herdik hmasa phawt a ṭul a. Herdik a ni hnungin rimawi an rem chau hlak” tiin. #dawrkawn