Phengphe khua tlai khawi ṭan dan

Zohnathlak sul khat suoka mi ei ni ang hrimin Hmar le Lusei/Dulien hi ei lo inhnai hle a, ei ṭawng hai hrim hrim khawm hi an hnaia ei ṭawng upa ei ti hai hi ei ṭawng ei inhmang thleng ang deuin ka ngai hlak. Chu le inzul chie chu ni lo deuin, amiruokchu, hla thu le ziekna kawnga hai hmang hlaw em em el Dulien ṭawnga “phengphe khua tlai” ti hi a ṭobul, lakdawk a ni ṭanna ka ngaiven a. A thu hi a umzie le a hril tum chu ei hriet deu fur ka ring a, amiruokchu, an ṭanna le serdawk a ni dan tak hi a hrilfie thei ei vang fut chu ka ring. Chuleichun, hrietchieng nuomnain ka sip a.

Thu pawimaw tak el ni naw sienkhawm, hi lai thu hung serdawk a ni dan hi hrietchieng ka nuom a. Biek thei ka nei ang ang chu ṭawng tieng le tienami thil hre deua ka ngai hai ka rawn tawl a. A hrie ei lo tam naw hle. Chu laia chun Mizoram a um ka ruolpa James Varte ka zuk rawn a, ama chun mi dang zuk indawn sawngin chu zar pei chun a ṭobul ni ding awm chu a mi hung hril ta a nih.

Ama in a mi hung hrilsawng dan chu hieng ang hi a nih: pengpelep hai hi a tlangpuiin zing tieng huna hin an suokdawk hlak a. Chu chun parzu an dawk ding hin an suokdawk tlangpui hlak a. Zing tieng a suok ve loa chawhnung tienga pengpelep suok hai chu, an ruolhai zing tieng a lo suok haiin an dawk ding hai an lo dawk zo deu vawng ta hlak leiin, mi hnung - chawhnung tienga suoka parzu dawk ding zawng hai chu an hlawsam ta hlak a. Chu leia chu, phengphe khua tlai ti ṭawngkam hi hung serdawk ṭang a nih tiin a hril.

A umzie chu, a hun laia suokdawk ve loa mi hnunga suok hai chun chan an nei ve ta naw a nih. Pengpelep inhnu hai anga ei inhnu chun thil an hnu thei a, ei chan ding ang ei chang naw hlak a. Chuleichun, ngaizawng thil a dam, annawleh, ṭhang lakna ding thil hril a ni huna hai phengphe khua a tlai zo tah, annawleh a tlai zo hma hian ti hi hmang a hlaw em em el a nih.

Pengpelep chawhnung tieng a suok hlak hai anga ei suok a ni chun, chan boin ei khawsa hlak ding a nih. Chuleichun, pengpelep anga inhnu loin ei thaw ding ding hi a hun takah thaw tum hlak ei tiu ti an lo in hrilna hlak deu a hawi.

Ei tienami dang Zawlpal le Tuolbung hai chanchin a khawm a tawp tienga khan pengpelep nupa an um a hril a ni a, hriet buoi um thei a nih. Zawlpal le Tuolbung hai tienami a mi le chu an ang naw deu a. An hun tawp tienga Tuolbung in Zawlpal a thlan a pan a, chu chu a pasal Phunṭhi in a va hnawt a. Amiruokchu, Tuolbung chu Zawlpal a thlan a chun a hringna a lo lak hman taa. Chuphing chun Phunṭhi khawm chun a hringna a lak ve a, nisienkhawm, Tuolbung le Zawlpal chun pengpelep in an inchang sana an vuong hmang san ta dai a. Chutaka chun, Phunṭhi khawm chu pengpelep in an chang ve nawk a, an hnunga chun a hnawtzui ve ta pei a. Chu thil chu a nih vawisun chen a pengpelep nupa vuong hai hnungah pengpelep dangin a zui ve hlak hi, Phunṭhi in Zawlpal le Tuolbung hai nupa a hnawtzui ni a hril hlak a nih.

Pengpelep hai anga ei inhnu hmain ṭhang la thar ei tiu!