Ei inang nawna a lien tak

Chuongchun, Pathienin ama angpuiin mihriem a siem a, Pathien angpui ngeiin a nih a siem chu, pasal le nuhmeiah a siem a nih (Gen 1:27).

Hi thu hi hun sawttak a inthawk ziek ka lo tum taa, ka ziek vatin ka sukbo nawkin ka ṭan thar nawk hlak a. Tuta ṭum hin a zîksuo hram ta ding chu a hawi. A pawimaw ka ti a, ei ṭhangmawbawk lien laia pakhat niin ka hriet bawk.

Khawtlang le hnam thil a hin hriet tlawmte chau ka la neia, tawnhriet khawm tamtak ka la nei naw a. Kan hmang tak tak hmain ka rielsan nawk bawk leiin a hril a hril le a ziek hi ka theitawk niin ka hriet hlak. Chu laia chun tuta thupuia ka siem, “Ei inang nawna a lien tak” ti hi tlawmin hang suklang met ka nuom.

Hotuhai ditsakna zarin 2013 khan thlang tling ni loin HSA CCPur JHQ a ṭhanga hnam rawngbawl ve dingin laklut ka ni ṭan a, chutaka inthawk vawisun chen hin hril nikhuoah ka ṭhangve annawm ti thei dingin ditsakna insang la chang zawm peiin a pumpui huopa hai chen laklut ka ni zawm ta pei a. Ditsakna ka chang hi a hlu ka tiin a ropui ka tih.

Nisienkhawm, hi hun sung po po hin lawmna hla sak char char a hun hmang chu ka ni bik nawh. Hi thil hin ei inang nawna a lien zie chieng takin a mi’n hriettir pha a ka lawm hle a nih.

Kei hi ka ṭawng rawn lei el chau ni loin, ka ngaidan hai tlang taka ka hril hlak leiin mi hin hmaisana mi lawm ang deuin hril hlak hai siekhawm a mi lawm le ngaina tak tak an tam naw hle a. Amiruokchu, mi ngaidan chu an ngaidan lo nisienla, ka hlutna nia ka hriet chu vawng zing ka tum ve tlat.

Hnam sunga rawngbawlna kawnga hin pawl chi dang dang ei um nuol a, pawl sunga a hlek a lan ṭhe nawkin a hran hranin inthlawppui thei bik le bik naw neiin ei um tawl a. Faction chen ei nei bawk. Hienghai po po hi a san ni a ka hriet chu ei inangna neka ei inang nawna a lien tak a ei sie hlak lei niin ka hriet.

Mihriem hi hnâm a biek pei naw hi nei ka tum naw a, kan milpui thei rak naw hai khawm a ṭul a ni chun dawkan pakhat awttlang thei dinga lungril siemfel ka ni leiin harsatna lientak ka nei nawh. Ka tum ang hrimin ka thaw thei bawk, a mi hnâm le mi hmupei naw ngawi ngawia ka hriet chieng em em hai khawm a ṭul phawt chun kan chibai puia dawkan hmunkhat thingpui no ka dawm tlangpui thei. Kei ka inpakna a ni nawa, ka mizie le ka khawsak dan ka hrilna a nih.

Nisienlakhawm, chuong ang chu mihriem ei lo ni vawng naw a. HSA a hotuhai ditsakan ka changna kawng ringawt a khawm hin inkhang an lo um hlak, asanchu, an mi’n angpui na neka an mi’n angpui nawna kha a lien lem leiin kei le inmil a um harsa an ti lei a ni ka ring, chu chu thil pawi tak el a nih.

Pawl dang dang a khawm hi hi ei harsatna lien tak laia pakhat a ni el ta awm de aw ka ti hlak. Mihriem hin ei mihriem chanpui hai le ei inang nawna char char ei chingdawk pei ding a ni chun inrem tik ni a um thei dingin ka ring naw a. Chu thil chun, hla a ei sak dup dup hlak “ṭhangruolin lungruolin” ti chu a mi’n thaw tir thei naw ding chieng taka hril thei a nih. Amiruokchu, ei ni rawi tlawmte hai hin, ei inang nawna, mi laka ei danglamna annawleh an danglamna hai chingdawk nekin, ei unauhai le inangna, ei inhnikna le ei lungruol theina hai ei chingdawk a ni chun kawng chi dang dang ah hrattakin ieng thil khawm ei thaw thei pei ka ring.

Ṭuiṭhaphai laia ding lem chun hnam tlawmte te, tlangmi hnam hai ei kar hla em em anga in hrilna le inkawp thei der loa ei umna hai dam hi ei ṭobul ei chieng naw lei, tlawmte haiin an ni agenda hmanga an mi ṭhedarna lei dama inhmukhawhri, khawvel um sung po po inrem thei der ta lo ding anga ral mit meng a meng vawng ei ni pha, a pawi takzet. 

Inangna, inang nawna hi ei nei seng a. Asanchu, mihriem inhnik chi dang dang, nuom chi dang dang nei ei nih. Ei danglamna le ei inang nawna hai hi a hlu a, ei inza thiem hi a pawimaw ka tih. Chu laia chun ieng iem ei inhnik le ei inangna hai ei hrietchieng chu a pawimaw hle. Hi thil hi a ho a, hril a awareness nei tham khawm a niin ei hriet naw el thei, nisienkhawm, lam intluon ei hrawna kawnga mi hai le chawnban a ruola mi’n vawr tir thei naw tu, mi khit tlat tu niin kei chun ka hriet a nih.

Mihriem hi ei inang nawna nekin ei inangna hi a tamin a lien lem a, amiruokchu, chu chu pawimaw a sie loin mihriem ei ninaa ei inang nawna tlawmte chau chu lientak a sie in ei ni le ei ni harstna lien tak el ei insiem pha a hung ni tah.

Mihriem seng ei nih, i sir el a um khawm kha mihriem, nang ang chara ṭul le mamaw nei ve. Chuong zawnga ei khaw thlir ei thlak danglam thei chun, ei kara harsatna lien tak tak el innghat ruou anga ei hriet hai chu hriet naw karin lo insawn el an tih.

Puitling ta hle, hre hne em em le tawnhriet ṭha tak nei anga ei lo inngai ta khawm a ni el thei, dem ding a ni chuong nawh. Amiruokchu, “learning to connect” - mi le inthlungzawm ei lan chuk chu a ṭul a hawi. 

Tlar hmasataka ei suklang Pathien thu besan ngei khawma mihriem hai chu Pathien anguia siem ei ni zie a mi hril chieng hle, ama chu bâwng ang amanih vawk angin a siem a ti a ni naw hrim hrim. Pathienin ama angpuiin, pasal le nuhmeiah a siem a nih. A dang ang deu neiin a siem a ti khawm a um nawh, ei inangna hi a lo va lien lawm lawm ngei de! Ei lo hriet nuom naw lei chau annawm. Mihriem inang tak el chau khawm ni lo, Pathien angpuia siem ei ni hi ei lo innghil hlak, a pawi.

Hi thu hin ka khar nuom - ei inang nawna neka, ei inangna a lien taka ei sie hunah khawtlang, hnam le kohran hai hrattakin hmatieng pan thei ei tih. (Thlaphal 20, 2020)