Meeting kalhmang

Tulai ṭhangthar hotu thar ei hung ni ta pei a, ei Ṭhalai deu deu ding khawm niin an lang. Hi le inzawm hin meeting procedure am ei ti ding, meeting fedan kalhmang hi in zirtir ei pawimaw ta hle in ka hriet. Meeting ei ti hi thil pawimaw tak el, ei fe dan ding, hmalak dan ding, a ieng ieng khawm ei induongna hmun, ei relna hmun a nih. Hi hmuna hin ei suksuol amani ei thawsuol chun a dang khawm ei suksuol pei ding a nih.

Chuleichun, ka tawnhriet a inthawk tawite in ka ṭhahnemngaina leiin ka hung zieksuok ding a nih.

Meeting hrim hrim ah President/Chairman chu ro khaitu ah a ṭhang ding a nih. Hun hmasatak ah ngirin inhmelhrietna a ṭul le siem a ta, a ṭul naw chun thuhma hrilin, a hril zo le ṭawngṭaina amain amani mi dang in nei tir a ta chu zo ah Secretary (Ziektu) chu Agenda in suklang tir a tih.

Secretary in Agenda a suklang zo hin ro khaitu kuoma bawk hun inhlan nawk a tih. Chairman/President in Secretary kuoma thu a pek a ni si naw chun Agenda hai hrilfie amani thil dang dang hrilsa chu a sin ding a ni nawh. Agenda a suklang zoin ro khaitu hun anhlan nawk el ding a nih. Chairman/President chu ro khaitu, thu lai tantu ding a nih ti in hre zingin ama ngaidan le ditdan a âwn rak ding a ni naw a, members/palai hai ditdan tam lem na tieng âwnin annawleh, thu an lai thei dan takin a tan lem ding a nih. A ngaidan sei tak a hril ding khawm a ni nawh.

Chu zo chun a dawt dawt a fein ro khaitu in Agenda chu members hai hriltlang thei dingin suklang pei tang a ta, Secretary chun ziektu sin a thaw ding a nih. Meeting na hrim hrim ah, Secretary chu zieklut na sin thawng a ta, ngaidan-ṭha ti dan amani a hril a hril ve ding a ni nawh. A ṭul a ni leh, ro khaitu (Chairman/President) in hun a pek le chau hun hmang thei a tih. Ro hlui le activity, minute book a mi hai chu hrilfie thei ding le phet dawk zat zat thei dingin Secretary chu inpei sa diemin a um zing ding a nih. Members haiin zawna an nei a, resolution hlui amanih en a tiem lang a ṭul chun Ro khaitu in hun a pek dan izir peiin hun a hmang lem chau ding a nih. Meeting/Committee na hmun ah Secretary haiin ngaidan an hril an hril ngai nawh ti hi inchik ding. Ngaidan a hril a hril a ni chun, palai/members haiin an kawk el ding a nih.

Chun, members tuelkhawm ni hai sien, ro khaitu in Agenda a suklang a ngaidan hrilna hun a siem hun ah - Meeting inzanain ro khaitu Chairman/President chu mawl biek el lovin Pu Chairman/President/Speaker ti a address hlak ding a nih. Chu bak a chun, ngaidan hril tawm ah, a ngir ding an um naw ema, annawleh, a hril nuom an um naw ema zuk ngir ka tih ti hai hi ngainat um taluo thil a ni nawh. A ngir le a hril ding an um naw leia hril mei mei ding nek chun hril naw law law khawm a pawi nawh. Hril ding si si chun thunawi nei nel nuol a hril a ṭul hran nawh. Felfai taka hril lem el ding a nih.

Member zakmaw lei, member senior lei, annawleh ro khaitu hriet le nêl zawng a ni leia palzut el lo ding. Meeting naa ro khaitu chu inzataka biek ding a nih. Meeting na hmunah tuol nun sawmlut a thieng nawh.

Meeting ṭhang ding hrim hrim chun emergency a ni si naw chun, Agenda hai lo thlirlawk a, ngaituona lo sêng lawk hlak ding, mihriem inang vawng naw inla khawm committee members ni thei chin chu vantlang chunga ngaidan nei thei le hril thei anga ngai ei ni ta leiin meeting na hmun ah to in mum el loa, a ṭha le a ṭha naw thuhai bek hril ve thei dinga inbuotsai ding a nih. Chun, members haiin ngaidan hril hun ah, ngaidan inang lo le ditdan inang naw a um hunah, inkal bur ngailo ding. Members pakhat in ei ti zawng ni lo le ei ngaidan, ṭha ti zawng ni lo an hung hril a ni khawma, an ngaidan chu appreciate thaw reng reng ding. Chu zo ah, ngaidan mani ṭha ti dan, a kal zawng ni loa hril hi members inkara inza suklangna a nih. Meeting a ditdan inang lo le ngaidan inang naw lei ringawta meeting puotieng chen chen a lungril la putzing hi a ṭha naw a, a hrisel naw bawk a, chîng lo ding a nih.

Meeting hi hohlimna hmun a ni nawa, class subject in zirtirna hmun khawm a ni naw leiin members haiin meeting fena san chieng taka hriet ding. Meeting Chairman, annawleh, members hai an ngir zing laia lo hohlim sar sar zing amanih, thil dang dai lo ngaituo hai hi meeting zie a ni naw a. Mâwlna zie a ni leiin ei thaw hlak a ni khawma bânsan tum ding. Thlangtuhaiin an aiawa roreltu dinga an thlangdawk committee members nina hlutak hi vawngin, aiaw pek hai ta dinga ro ṭha, ro puitling rel thei dinga inbuotsai ding a nih. 

Member in agenda baka thu dang a hrilsa nuom a ni chun, ro khaitu a remtina la hmasain a hril chau ding a nih. Agenda puotieng daia mi a nuom nuom a maihrut el ding a ni nawh.

Pawimaw em em pakhat chu, mi hril sa hril nawn hril nawn ngai lo ding, thu tawi le felfai taka hril hlak ding. Mi hril sa va hril va hril le thu liemta hnung hrietsa hai hril nawn hril nawn hin meeting a suk buor thei a, inhnikna a tlahnuoi nuom bawk leiin fimkhur chu a ṭha bawk.

(Hi thusep hi kum tlawmte liemtah laia ka ziek le ka lo thawndar taa a ni a, blog ka sukthar le inzawmin ṭha ka ti em leiin ka siemṭha met a ka sie lut nawk a nih. Thlaphal 21, 2020).