Tulai Tuiṭhaphai - I

India hmarsak biel a state um haiin nasataka an buoipui luoi luoi CAB chun Tuițhaphai hai so a them phak rak naw nisien an lang, CAB dodalna leia pawl tum tum haiin zani laia Manipur pumpui Bandh an puong chun phairam biel tieng ursun hai sienkhawm Tuițhaphai lai chu nundan pangngai takin a fe. Amiruokchu, ei țhat tlangna lem ding thil a ni le a ni naw fel taka ngaituona siem ve chu țha dingin an lang.

Kum a thar zo a mitinin mani sin le umna hmun tieng hai an pan fel tawl nawk deu fur tah a. Zirna run hai khawm Krismas le phalbi châwl an hmangzoin an lo lut țan nawk diet diet tah a, naupang inkhawmpui le inbichil hman loin a um a lawm a um.

Ni khawm tawi tieng nekin sawt tieng a pan deu deu a, boruok khawm an lumlet dan hrietthiem um rak lovin a um deu ran. Van innim in ruo nasataka sur tum hlak sienkhawm a la thei tak tak naw a, boruok dei pangngai ding ang nekin boruok a suklum deu a, zan huna ruok chu a dei hle thung. Khuo an țhal ta leiin a khu a, chu el chau chu ni loin tui khawm a tlawm taa, tlangram a tuikhur ah țhal tui kang nghak dam ei hrietsuok. Mitin tui pawimaw a na ta hle.

Traffic Police haiin an sin an thaw țha a, helmet khum le khum naw check thut an la thaw zing a, traffic point hmang chie naw inla khawm traffic buoi zuol ding an veng nasa hle. Helmet check a, himna an ngai pawimaw tak tak a ni si chun mi inring naw hun inchan le nuom hun huna check thaw lovin, nitinin enkai hai sienla chu țha lem a tih.

Pasal sam tantu Pawl haiin an sam tan man a san mumal um loa 40/50 chena an hung vawrkai chu ADCC in a hrietpui le a pawmpui naw leiin Tuițhaphai khawpui sunga sam tan tuhai chu an inkhar tawl a, an strike (official newshmu um lo) ni dinga ring a nih. Tuițhaphai a hin thil man kaisang hi a hluor em em a, a san mumal tak um loin fak le dawn le thil man dang dang hai hi an țhang duok duok hlak a, tlahnuoi nawk ta loin an sang sawng pei hi a tam hlak. Hi kawnga hin CCC haiin nasataka țhang an lak nawk zuol a pawimaw.

Kum thar lawm zo, naupang school lut le sengna ding thil tam hun lai tak a ni leiin khawpui sunga bazar a thil inchaw ding a inlawn vel, ni dang angin an tam naw hle a, sum invir a tam rak naw ding sien an lang a. Sumdawngna dawr thawtu hai khawma tulai mihriem a dawrtu an tam ngai rak naw thu hai an hril.

Kum ei zuk ințan tir angin ngai inla khawm thla thar ei lo chuongkai nawk taa. A țhen chun kum thar thuthlukna țha tak tak ei nei tawl ka ring, chuong hai chu suk puitling tum ei tiu a nei haiin. Thilțha le thil indik hnawt ei ta, Pathien ring ei tiu. Puotieng mawina nekin sungtieng mawina hi nei tum lem ding a nih, puotieng mawina'n ruo le ni a ngam tak tak nawh! (Feb. 1, 2019)