Rambung dang dang a hai Covid-19 vaccine peksuok a hung ni mek lai beiseina insangtak ei lo thlir laiin kumpinu lal ram UK a chun Coronavirus zie thar hmudawk a ni thu lungțhawng um takin an hung puong nawk ta phawng el. Khawvel a ram tum tum hai chiaina thu an tlun a. Hi Covid zie thar hi tuta Covid inleng mek neka 70 per cent a hrat lem a inkaisawng awl niin an hril a. UK le infepawna hai an khar țuk țuk tawl tah.
CORONAVIRUS STRAIN THAR HI IEM ANA?
Tuta hri zie thar UK scientist haiin an hmudawk hi "VUI-202012/01" an inbuk a. Scientist hai hril danin tuta genetic mutation lei hin mihriem le mihriem inkara Covid-19 inrang lem a inkaina an tlun thei an tih.
IENGTIK LE KHAWLAIA HMUDAWK AM?
BBC in a report dan chun, hi zie thar hi September thla daia kha UK a hmu a ni tah. November thla khan London ah hi zie thar case hi quarter khat vel hmu a ni a. Tuchena hin local area hmun 60 vel sunga mihriem 1,100 a kai thar tah niin UK Health Secretary Matt Hancockin report a siem.
KHAWLAI LAI AM HMU VE TA LE A HRAT BIKNA?
UK baka hin Covid in nasataka a sawi Italy a khawm hmu ve a ni a. France khawma a ringhla thu a hril. Australia khawma UK a inthawk an ram inlawi mi 2 haia inthawk hi zie thar hi an mandawk thu an report.
Nisienkhawm, tuta hri zie thar hin Covid-19 hri serious tak intlun a tih ti sukchiengna (evidence) a um naw a. Scientist haiin an hril dan chun, Covid țhangin virus tin ah mutation annawleh genetic change hi mihriema an invirkuol le inthlasawng vel hin a khatin a tlung hlak reng thu an hril a. Inkaizapna a hrat pal chun, hospital khum indai nawna hmuna hai chu harsatna tlung thei dinga hril a nih.
IENGTIN AM KHAWVEL AN PUOCHA?
Thawțanni khan ni tla ngai nawna hmun ram ropui UK chu khawvel rambung dang haia inthawk thlierhran a tuok țan a. Europe rambung dang dang hai chun UK le infepawna an khar hri phawt a, France chu a khar hmasatak tu rambung a ni nghe nghe.
France baka hin Germany, Poland, Sweden, Denmark, Finland, Austria, Bulgaria, Romania, Malta, Croatia, Lithuania, Latvia, Estonia, Italy, Netherlands, India, Belgium, Greece, Russia, Hong Kong, Israel, Argentina, Chile, Colombia, Ecuador le El Salvador hai chun UK a inthawk le UK pan vuongna hrim hrim an sukchawl hri phawt a nih.
INDIA IN IEM A HRIL VE?
India khawma a chunga rambung dang hai khi zawm vein Dec 31, 2020 chena dingin UK le infepawna hrim hrim international flight hai chu a sukchawl hri a.
Maharashtra state lem chun Europe le Middle East tieng rambung a inthawk state lut hai chu ni 15 institutional quarantine an fethleng a țul ding thu a puong taa, hi rambung ti loa inthawk lut hai chu HQ an fethleng ve thung ding a nih.
Chuong lai zing chun, Union Health Minister Dr Harsh Vardhan chun, sawrkar chun a hriet a inringlawk a um niin mipui hai chu tukhawm chiai lo dingin a hril a. Thla suk muongtu ni dingin Council for Scientific and Industrial Research Director General Shekhar Mande chun, tuta hri zie thar hi India a hmu a la ni nawh tiin a puong.
HRI ZIE THAR CHUNGA HIN VACCINE HAI AN ȚANGKAI VE DIM?
Tuchena chu, aw! Mimal in vaccine a lo inkapna ah hi hri thar hin nghawng a nei an ring naw thu scientist hai chun an hril a. Virus hin mihriem a kai țan tir a inthawk khan a zie vawitam an thlak taa, scientist hai chun chiaina ding a ni nawh an tih.
Mutation, zie inthlakna hi tlung sienkhawm vaccine hai sin thaw dan chu a pangngai zing ding a nih tiin Council for Scientific and Industrial Research Director General Shekhar Mande chun a hril.
US President-elect Joe Biden in Surgeon General dinga a thlang Indian-American physician Vivek Murthy chun, tuta UK a hri zie thar hmua um hi Covid neka țibaium le hringna la theitu țium lem a nina evidence a um naw thu a hril.
INVENG DAN THAR NEI A ȚUL AM?
A țul hran nawh. Tuta Covid-19 laka him theina dinga a vel a vela hrillang - kut sawpfai rawn (hand sanitizer hmang khawm), hmai tuomna hmang, pungkhawmna hmuna um lo, mi le inpaw rawn lo hai chu a ni zing.
Dr Om Srivastava, Director Infectious Disease, Jaslok Hospital and Research Centre in a hril ve dan chun, a symptom dungzuia thlir lem chun Covid-19 le danglamna a la um hri naw thu a hril a.
Mumbai Covid-19 Task Force member ni bawk Dr. Srivastava in a hril pei dan chun, mi tukhawm thu vuongva inlengvel mei mei hai laka fimkhur ding le scientific evidence a chau innghat dingin mipui hriet dingin a hril a, ei ni hai khawm a mi huom ve nih. Thuvuongva a hung tam el theia, hmu le hriet taphawt thawndar zung zung hai insum tum ding a nih.
A chiai le thlabar zawng ni loin, fimkhur taka kalchawi pei a hung țul tah. A chunga thu hai hi news report a inthawk lakdawk a ni a, mipui hai laia țangkaina um thei dinga beiseina leia, mithiem le ringtlak report um sa ei țawng a ziekdawk, mimal ngaidan ni lo a nih.
0 Comments:
Post a Comment