Nasataka ei hmang, ei inbiekpawna tak ni tah WhatsApp chun chawlkar liemtah khan an Privacy policy thar an puong a, chu chu Feb 8, 2021 a inthawk hmang ṭan a ni ding thu an hril. Chu Privacy policy thar chu a hmangtu mihriem abikin India haiin ṭha an ti naw hle leiin dodalna nasatak a tuok zing a. Chu a dodalna tuok chu WhatsApp in ṭhel tumin ṭhang a laka hrilfiena thar a siem a chu mihriem lungril a hne tak tak thei ta nawh.
Hi thil leia WhatsApp in a hmangtu a chân dinga hisap chu Indian users 15 per cent hai platform danga insawn an ta, a dang 36 per cent hai chun WhatsApp an tawpsan ding niin LocalCircles in survey a thawna chun a hril.
WhatsApp Privacy Policy thar chu iem a ni a? Ei thei ang a tawifel in zuk hrilfie tum ei tih: Dan thar a hin WhatsApp in Facebook le information an ṭawmpui dan ding induong le information inṭawm a um chu an hmang pawl thei dan ding hai induong a ni a. Information hi personal message hai a ni nawa, business thil le inzawm hai a nih. WhatsApp hi Facebook ta ni ta kha ei hrietzing ding.
“As part of the Facebook family of companies, WhatsApp receives information from, and shares information with, this family of companies,” tiin privacy policy thar chun a hril a.
Information kan dawng chu kan hmang thei a, kan service le an offer hai awlsam lem market le support kan pek theina ding dingin information chu an hmang thei ve a nih tiin WhatssApp chun an hril a. Hi hi a nih hmangtuhaiin an data a himtawk naw dinga an ringhla le an ṭi tak chu.
Social Media platform hai hrim hrim hi a siemtuhaiin thiem taka an siem a ni leiin ei data hai hi a him tak tak a um naw a, ka personal data him sienla tech company tukhawma hre naw raw hai sen ti ei nuoma Privacy ka maintain nuom ei ti a ni chun ei Social Media Account hai po po hi ei sukthlawng a ṭul ding ang tluk a nih.
Policy thar dungzuia WhatsApp in information a lak ding chu iem a nih? WhatsApp in information a lak ding a ti hi ei in chat na hai a ni naw a, asanchu, ei in chat na hai hi encrypted, Company khawma an hmu thei bik lo a nih. Chu chu ni loin personal data an lak hai chu user phone number le a contact hai, profile name le thlalak, diagnostic data hai a nih. Chatting le inbiekna hai ṭithawng ding a um nawh.
Tuta Policy thar hi Feb 8 a hung hmang ṭan a ni hunah thlang ding hung inlang a ta, chu taka chun aw le aw awiah ti ei thlang dan izirin WhatsApp hmang zawm le zawm naw innghat tang a ta. Notification hung inlang chu, ka phal ti a remtina pe hai chun WhatsApp hmang zawm thei an ta, a remti lo hai chun WhatsApp an chawlsan ding a nih. Amiruokchu, dodalna le demna baka a hmangtu tamtakin an tlansan pha leiin WhatsApp chun mipui ringzona nei nawk tumin newspaper a hai nasatakin hrilfiena a phek tawp tawpin siem sienkhawm ringzona a hlaw kir el ta naw a. Chun, Feb 8 a inthawk hmang ṭan dinga a ti khawm chu a la ṭhul hri phawt a nih.
Expert hai chun WhatsApp hrilfiena siem chu mi ṭhuoisuoltu an nih tiin an hril a. WhatsApp hrilfiena chun WhatsApp in ieng thil am a thaw thei naw hai an hrillang rak a. Mimal data a lakkhawm hai chu iem a law ding ti an hrillang naw a nih tiin an hril.
Ieng leia India in a tuor bik? India hin regulatory authority mumal a nei naw a. Personal Data Protection Bill hi dân an chang hma chu tech company hai chunga thu nei thei tak tak nawng a tih. Europe rambung le rambung dang ṭhenkhat a hai chu an Policy hi a pangngai zing a. Asanchu, enkaitu ṭha tak an nei lei a nih.
Tuta Privacy Policy hieng anga thlak a hung nina san tak chu sumdawngna, tangka lamna ding hisap a ni tak a nih.
WhatsApp a um zing ṭi a um am? A um naw a, miin an bawm mur mur Signal le WhatsApp hin end-to-end encryption (E2E) an hmang ve ve a. Chu chu, tukhawma ei inbiekna message hai ei ni a sut tu hai naw chun arukin an lo en thei chuong naw a. Telegram khawm E2E tho a ni a. Platform thar an ni tawl nawh.
I data hai fimkhur leia WhatsApp i lo tawpsan nuom a ni chun a pawi nawh. Amiruokchu, WhatsApp i tawpsan hnunga Facebook Messenger, Instagram hai i la hmang zing tho chun WhatsApp khawm hmangsa law law la thuhmun zing a nih. WhatsApp chau hmang naw kha, a dang hai itawpsan si naw chun himna a ni chuong nawh.
WhatsApp in i message hai Facebook a peksawng am? A chunga hrillang ta ang khan E2E hmang a ni leiin chuong ang thil chu a tlung thei naw a. WhatsApp a media in share hai hi E2E in a huom vawng a. Tukhawma an hmu thei nawh.
Facebook in WhatsApp contact access a nei am? A hmangtu in remtina (Permission) a pek chun Facebook in a hmang thei.
A hnuoia ang hin Chatting platform pathum - WhatsApp, Telegram le Signal haiin data an lak dan ei hung suklang:
WhatsApp: Device ID, User ID, Advertising Data, Purchase History, Coarse Location, Phone Number, Email Address, Contacts, Product Interaction, Crash Data, Performance Data, Other Diagnostic Data, Payment Info, Customer Support, Product, Interaction, Other User Content.
Telegram: Contact Info, Contacts, User ID
Signal: Phone number.
Tulai India mi tamtak le khawvel mi hausa tawntaw haiin hi thil hi an buoipui a ni a. Ei ni lai ngei khawm a tuifawnin a mi khieng phak tawl phar phar leiin Signal le Telegram a insawn; A ṭhen lem chu WhatsApp chen tawpsan khawm an um pha, mihriem hma ei sâwn a security le privacy ei ngai pawimaw ta lei a nih.
Smartphone ei hmang ṭan a inthawk hin ei data hai chu ei pekdawk nghal a. Internet ei thawna kawnga ei browser hmang le a dang dang ei thawna haia hin ei him tak tak naw sa a ni a. Apps dang dang ei hmangsa bawk a, hienghai hin ei data an lak ve vawng bawk a nih. A pawimaw tak chu ei apps hmang hai hi Company ringtlak an ni am ti hi ngaiven a pawimaw a. Ei data ei pekdawk, an lo hmu hai hi ei ni sietna dingin an hmang thei ding am ti vel hi apps ei hmangna kawnga ei fimkhur pawimaw lem chu a nih.
Facebook hai lem hi chu US le EU haiin policy thuah an khat tawka an ko deu zing hai an ni a, guarantee ei in pek thei nawa chu ei data hai chu an abuse ngam ring a um hran naw a nih.
Ei ni rawi India ram kilkhawr a um, sawrkarin pawimawa a mi ngai phak lo hai ta ding lem hin chu a chunga ei hrillang ta hai ang khin ṭi taluo ding thil ieng taluo a um hran naw a. WhatsApp a inthawk insawn buoia Instagram le Facebook hmang zing si dam kha kawk a um naw ding a nih. Chuleichun, privacy ei maintain nuom a ni chun Social Media tawpsan hi a lampui ṭha tak a ni a. A ni si naw chun tech company hai ka iengkhawm pein inhriettir nawng ka tih, ti chu thil thei lo ang tluk a ni tah. Amiruokchu, khawvel thil trending ei zui nuom ve reng reng chun a pawi chuong nawh!
A bengvarthlak khawp el. Lawm a um.
ReplyDelete