Krismas le Kumhlui zûn

A phuoktu Jonathan Hmingthantluanga hi kawppui nei a ni ta'm ka hriet nawa, a saktu Tetei Ralte khawm hi a ngirhmun chieng takin ka hriet nawh. Amiruokchu, a ziektu le saktu hai hin an thahne hlein ka hriet a. Combination a fuk țha hawi!

A saktu hi thiem filawr hlak chu a ni nawh. Ka ngai rawn deu deu a, nal ka tiin a ziektu hi a thiem ka ti na a zuol deu deu. A hla ka hriet a inthawk hieng tik hunah, kumtin hin ka ngai hlak a, țha ka ti tawp thei nawh. A ziektu lungril ding awma ka ngai, ka hung ziek pher phuor a nih.

A ziektu Tluanga hi khawsawt thei mi tak, ka ruolpa ang deu, khawsawt deua hang um thut thei mi khawm nisien a hawi ka tih.

Kumpui linglet, kum khat hun an her liem nawk ta ding thu in a lut țan a, BER thla pakhat taka a ziek a nih ti a suk chieng. BER thla ei chuongkai hin, pi le puhai chun inpâng ler ah thlasik arpui ruol a țum tah an ti hlak a. Thlasik ințan, favang khawsawtum hun lai tak a nih. Ni a sat dan hai khawm a mawi țan ta a, fur ruopui tlak hun boin van boruok inthieng em em el a suok tah.

Chutaka inthawk insawn peiin, Van lal pieng hun Krismas chu damtea ei lo tlung nawk thu a hung hrilkai a. BER thla a hin chu Krismas hla hai ei ngai țan ta hlak a, mitinin ei nghakhla le ei tung em em a nih ti suklangna di'n mawi em emin, "zaleng zawng ten hranglu iang an lawm e" tiin. 

Tienlai khan pasal haiin sahuoi, sahrang an kap chun pasalțha anga ngai hlak an nih. Chuong ang sa chu an kap châng, hlawtlingna ropuitak pakhata ngaiin an lawm em em hlak a nih. Chuong ang deu chun, hi hunpui zalengtin haiin hranglu ang el an lawm a hrilna a nih. Hun lawmum, hun inhawi le hlimum a ni chieng ngei. Nisienkhawm, hi hun hi tamtak ta dinga sung le kuo, ruol le pai lo famtah hai ngaina hun a nih ti a mi'n nghil tir bik naw a - "fam ngai te tan suihlung ti lengtu mai" tiin a chang hmasaktakna a suktawp a nih.

Isu pieng lawmna hun, Krismas carol le insukhlimna hun inhawi tak ni hlak sienkhawm, țhen le ruol, laina, fam ngai hai ta ding ruok chun khawsawtna chau a ni ve ti mawi takin a mi suklang pek a nih.

Hieng hin a zieksuok a:

"Kumpui sul pawh a her liam leh dawn ta,

Sikni engmawi ngai ten a her chhuak e;

Vanlal pianni champha damten kan thleng leh ta,

Zaleng zawng ten hranglu iang an lawm e;

Fam ngai te tan suihlung ti lengtu mai"

Krismas le kumhlui chu inthla an ruol hlak a, Krismas ei lawm zo le kum hlui inthlain a zui nghal hlak angin hun le kum hung thar ding chu thlir zing puma inthla liem ding kumhlui chu khawsawtna ding tamtak a um a, lungril khawm a ngui deu ruoiin niin a ziektu hin a hril a. Țhen le ruolhai, țhalai member hai le krismas lawma lungruoltaka "u ama" sak dat dat lai hai a ngai hle ning a tih, khuo suksawttu chau an nih tiin a chang hnina chu a khar nawk a.

Tluanga hi a thiem ka ti zuol em em nasan chu, a hla ziek hi khawsawt le ngainuomum takin a bat batin an fe tir a. A then chun an hla ziek hai hi an inper kalang tir a, an nuomna hmun hmun an thairang vel mei meia chuong chu a um nawh.

Ber thla tlunga, phur a um thu le khawsawtna hun a ni thu lungleng taka an zawt zo chun, khawsawt leia lung riktak phur angin um sienkhawm, kumhlui chu inthla liem dingin an peifel taa. Kumhlui chu inthla satlie el loin, nunhlui ngaia a khawsawtna hai khawm chu "kumhlui" a liem ruol chun zuk fen ve nghal dingin an cha a nih, a thiem hle el. Chu umzie chu, nunhlui ngaia khawsawt le riktak a kumthar hmel hmu tum loin, mi thar nun thar, zângkhai takin hun hung thar chu lo hmuoka chuongkai tum ni ngeiin an lang.

Chu zo chun, ama hma siel der loin, hun le kum hung thar ding chu mihriem hai ta dinga malsawmna ni dinga ditsakna chibai buk dingin a zuk ngen a. Amiruokchu, a khawsawt chu inthla ta sienkhawm, ankieng tak tak thei ngang naw a, kumhlui zun ngaiin a khuo a sawt hle thu chun a chang thumna chu a la zuk khar țawk țawk a nih.

Chang thumna a chun hieng hin an zawt a:

"Awle, kumhlui damten mual liam ta la,

Nunhlui ngai a suihlung len hruai ve la;

Hun leh kum lo thar tur hringmi tan malsawmin,

Min hlan ta che duhsak chibai buk nan;

I zun ngaih zawng suihlung a leng emai"

A châng karlaka hai hin a thunawn a siem a, hi hun sung po deuthawa a nun inthlak danglam dungzuia a ngirhmun a suklang a. Krismas le kumtawp chu hlim le lawmna hun nisienkhawm, hnemtu ngaia an vai zie a hril a. Bak chu an nawh, famtah hai chu, an mawina hai chul a, ngai lo ang ela an liem pei thu an zawt bawk. Nisienkhawm, kum hai chu a hlui a liema a thar nawk pei, siemtu in an duong dan a lo ni lem e. Ieng po khawm nisien, fam ngai khawm, annawleh, hranglu inchawng khum dinga phur le lo tung khawm ni inla, a ieng ieng khawm chu, a tawp taka chun innghil lo dingin - Lal piengni champha ei tlung nâwk ta thu chu ei theinghil pal inlau ni awm takin a thunawn kharna'n a mi sie pek a nih.

Krismas 2020 chibai!

Dâwrkâwn: Thlaphal 1, 2020