Pegasus spyware hi iem a nih?

Tulai India ram sawrkar selkaltu pawl haiin nasataka an khekpui Pegasus project ti hi tawite in a thu tlangpui hei tarlang tum ei tih.

Rep image

International media dang dang hai chu ṭhangkhawmin, Pegasus spyware hmanga mi enthlak a nih ti ringhlana um suichiengna le suidawkna sin chu Pegasus Project ti an inbuk a. Hieng international media dang dang ṭhangkhawm hai laia hin Indian media "The Wire" khawm a ṭhangve a.

An ni rawiin an suinaa inthawk hin phone number 50,000 neka tam chu a ruka lo ngai le enthlak char char ni ngei dinga an ringthu an hung puong dawk taa. Hieng hai laia hin India rama inthawk minister ni lai zing, selkaltu tieng hotu, judge ni lai zing, journalist 40 neka tam le sumdawngtu lien hai phone number ṭhangin mobile number 300 zet khawm chu a ruka lo bi ve zing ni dinga ringhla a hung ni ta bawk a nih.

Pegasus hi iem a nih? Tu hmang ding am? : Hi mi enthlatu software hi nang i remtina le i hrietpuina ṭhang loa i computer device sunga lutin, i data hai lakhawmin third-party a thawn ding a nih.

NSO Group kutsuok Pegasus hi khawvela mi enthlatu software siem ta hai lai po po a thilthaw thei tak a la ni a. Smartphone — Android le iOS sunga lutin enthlatu hmangruoin (surveillance device) an inchang nghal thei a nih.

Amiruokchu, a siemtu Isarel company hin an hmangruo hi misuol le firfiek thil a che hai bawzuina le enthlakna dinga siem a ni thu an hril a. Vantlang mipui hai enthlakna a hmang dinga siem a ni nawh tiin an hril a. Mimal a nuom nuom ihmang el thei khawm ni loin, ram sawrkar kuoma chau an pekdawk thei a nih tiin an hril bawk.

Smartphone iem a ni zat birukna dinga licence pakhat man chu nuoi 70 chen a kai thei a. 2016 a price list dungzuiin NSO group hin device 10 (iPhone) a lut a enthlakna sin an thawna dingin USD 650,000 an lak a, installation fee USD 500,000 an lak bawk. A fee an lak hai hi an ang vawng naw a, an sin thaw ding le an thawna hmun izirin a dang ve a. Chun, mi an enthlak ding hai belsa an ni chun a man hi pek belsa pei a ni bawk.

Iengtin am sin a thaw? : Security thar tak le inthuo Mobile phone nisienkhawm Pegasus software/spyware hi a dang thei chuong naw a.

Spyware version hmasa 2016 laia mi hai khan “spear-fishing” thaw dan hmangin phone a hai hi spyware hi thawn lut hlak an ni a. An thaw dan chu, an tum tak hai phone ah hi thil hi text message annawleh email fethlengin an thawn a. Chu chu an tum hai khan an lo hmet dinga beisei a ni a, an hmet naw chun a thei chuong nawh. Amiruokchu, tuta version an hmang a hin chu hmet (click) kher ngai ta loin phone a khan a lut el an tah.

2019 kum a inthawk khan chu WhatsApp fethlenga missed call chau khawma mi phone sungah an lut thei taa, enthlatu ding haiin missed call an thaw khawm a Phone kawltu in a hriet thei nawna dingin a thawtu hai bawk hin an sukbo thei a. Miin an enthlak tum a nih ti ringhlana le hrietna nei loin an siem thei a. Hi kum bawk May thla hin WhatsApp chun, Pegasus in Android Phone le iPhone 1,400 infect dingin a code a bug chu a suksiet tiin an tum a. Hi intumna a siem le inzawma phone enthlak ni dinga ringhla hai lai hin sawrkar official, journalist, human rights activist hai an ṭhang a. A hnungin bug hi sukfel nawk vat a nih.

Iem a thaw thei? : Hi Pegasus enthlakna hi phone ah a lut ta chun, a neitu in hre der loin chu phone a iengkim chu an nuom dan dana hmua enin an ngai thlak thei taa. SMS, Contact, Call History, Calendar, Email, Browsing history, thlalak le video, call record, WhatsApp chat, GPS, Camera, Microphone hai po po chu an dit dan ang charin an hmang thei a. Thlalakna hai khawm an thu thu in enthlakna hmangruo in an hmangsa thei ti a nih. A puiin ṭi a um rap rap hle el!

Pegasus history tlangpui: 2016 khan Canadian cybersecurity organisation The Citizen Lab a researcher hai chun human rights activist Ahmed Mansoor a smartphone ah hi Pegasus hrik hi an hmudawk hmasatak a.

September 2018 in The Citizen Lab chun Pegasus a ruka hmangna rambung 45 an hmudawk a. List nuhnungtaka hin India khawm a ṭhang ti hmudawk a hung ni tah. 

October 2019 khan India rama human rights activist le journalist hai chu hi enthlakna a target an nih ti WhatsApp in a hmudawk nawk a.

July 2021 khan “Pegasus Project” ti hmingput international investigative journalism hmalakna a lo fe chun (India) sawrkarin sawrkar official, selkaltu pawl hotu, journalist, activist le a dang dang hai chu a lo enthlak ngei ti an ringhlana le intumna chu an hung puonglang ta thut a. 2017 le 2019 inkar sung khan India sawrkarin phone number 300 lai zet a lo enthlak char char tiin intumna le an ringthu a suitu hai hin an puong a nih.

Hi thil lei hin India rama selkal pawl hai lung a awi thei naw a, Parliament Monsoon Session fe mek khawm chu inṭhung mumal thei loin an siem a. Prime Minister, Rajya Sabha Chairman le Lok Sabha Speaker hai khawm an lu an hai ta hle.

Hieng ang in enthlakna hi thil ṭium tak el a ni a, tu chunga khawm tlung thei a nih. Invengna a um naw a, invengna um sun chu sawrkar ringum lem siemna kawnga ṭhang lak le ringtu hai ta ding chun Pathien kuoma ṭawngṭai ni el tâng a tih. (August 1, 2021 in ṬhalaiWeekly a insuo a nih)