Lalpa chu ka berampu a nih!

Hrileng leia Krismas țum khat ei hmang naw zo hnungin 2021 chu hrileng la bo naw sienkhawm Lalpa zangaina zarin hlim le lawm takin ei hmang thei a, lawm a um hle a nih.

Kum dang nekin tukum Krismas ding kha ei tûng lem a, fam ngai hai khawm a na lem a hawi ka lo ti a. Chu thil chun ngaituo dang dang a mi'n nei tir pha a, chu lungril ngaituona chu thei angin mi dangin an mi'n țawmpui ding am khawm hriet ni loin ka zuk ziek suok tum a nih.

Krismas hi ei nghakhla a, Ber thla ei chuongkai ta lem hin chu hriet hman lo deuthaw in kar lovin ei tlung nghal el hlak. Krismas tûng dan hi a chi a tam khawp el, hrillang kher naw khawma ei hriet vawng sa a nih. Amiruokchu, Krismas hin a dang kawk a nei thei nawa, ieng anga phûr le phûr naw khawma Krismas chu Isu Krista piengchampha lawmna hunpui a nih.

Mihriem khawsakna le khawsak dan khawm hrat takin an thlak zing a, thlang ram hai khawsak dan le an thaw dan hai nasatakin ei lak kai zing bawk. Krismas hun ding a hung ni hin chu Isu Krista neka buoipui ding pawimaw hi mihriemin ei lo hau ta hle niin ka hmu. Ei buoi em a, thaw ding le thaw nuom ei hau em leiin ei lawm tak Isu a piengchampha kha hrietfuk le hlutsak a ni ta naw lem annawm a ni aw ka ti nuom deu.

Chu laia zuolkai deu le ei insukhmu thar nia ka hriet chu, Krismas hun a tlung țep a thlanmuol pan deu sup sup hi ei insukhmu taluo deu am a ni aw, ka tih! Mihriem khawsawt thei naw, sung le kuo famtah hai ngai lo ei um nawh, ei ngai ding hrim hai an nih. Nisienkhawm, Krismas hi in suk lungzing a thlanmuol tieng nghaa in dawmkun hun ni dingin ka ring naw a. Hi thil ei insukhmu deu nia an lang hi a pawi ka ti a, Krismas ei lawmna ding kawnga ei lawm ding tak lawm fu lo dinga suol hmangruo inchang thei nisien a hawi.

2015 November thla khan taksa bawrsawmna leiin ka nu in a mi thisan a, ka khawvel a tâwp tawp angin ka ngaia, ka lung natna le ka khawsawtna hai chu re thei dingin ka ring nawh. Amiruokchu, ka nu kan enkawl sunga kan beidawng harsat hun po po a ka'n nghatna "Lalpa chu ka berampu" a nih ti hin a mi țhuoi niin ka hriet. Vawisun hin insuk lungzingin insuk khawsawt em em nuom lang chu, ka Nu chu ka la ngai el, sin khawm mi'n thawtir mumal loa thlep el in mi la sie thei a tih. Nisienkhawm, chu chu ding chu a ni naw a. Krismas lem chu Isu Krista piengchampha, Isu Krista naw chu ngaituo ding dang um der lo hun a ni a, fam hai ngaina hun a ni nawa in dawm kun hun khawm a ni nawh.

Luka 4 na "Nazareth a Isu a hnawng thu" kha ei en chun, “Riengvaihai kuoma Chanchin Ṭha hril dinga a mi ruot leiin, Lalpa Thlarau chu ka chungah a um; Ama chun salhai kuoma suokna thu le, Mitdelhai kuoma mitvar nei nâwkna thu hril ding dâm, Suknawmnat tuorhai insuoktirna ding dâm..." tiin a mi hril a nih.

Lungngaina le beidawngna, fam ngai hai leia khawsawtna hai hi a bo ding a ni nawh. Amiruokchu, riengvaihai kuoma chanchin țha hriltu dinga ruota um, ei Lalpa Isu Krismas pieng hun a ni a. Lawmna ri vâwr hun a lo ni lem dai!

"Khawp le tlai taka um chang ni um sienlakhawm,

Saruok, beidawng, lungzing, tlaksamni um a tih.

Țapna ruom hraw lai khawmin Hmangaina a mi'n hmutir,

Lalpa chu ka berampu țha tak a nih"

Ei Krismas tûng dan hai hin, a pieng tak Isu nekin thil dang dang hin ei lungril ei in fu nasa tir taluo ta hi chu a pawi deu a nih. Hlim ei tum a, thapui hmangin ei hang thawlui rak hlaka chu a thei naw. Hlimna hi thawluia intlungtir thei chi a lo hawi naw hi tie. Țawngțaina leh, ei hmang hunpui tak hi ei thlir fuk naw chun, ei Krismas hmang chu a naran ni sunzawm ta zing a ta. Isu nekin thuomhnaw dam ngai pawimaw lem ei ta, Isu nekin sungkuo inhmukhawm dam ngai pawimaw lem ei ta, Isu nekin thlanmuol tieng ei lung inlen lem ta pei bawk ei tih. Nisienkhawm, ei lawm tak chu Isu Krista piengchampha a ni lem si a.

Thim a ka um lai khawm Lalpa chu ka var ni zing a tih!

Dâwrkâwn : Dec 30, 2021