Zu dawn chau hi suol a ni nawh!

Zu dawn hi ei hmu suol raka, to țawka dawn a zal khawm tam tak an um a. Zu hi suol bek bekin ei ngaia, dan dang ei bawsiet hai hlak chu ei uksak nawk mang si nawh. A buoithlak thei khawp el!

Indik lo taka tangka lam suoka sawma pakhat a peklut kohran in a dawng khawm um a tih, suol a ni zie hril a ni ngai meu nawh. Mani neka hnuoihnung lem le harsa hai dem le hmusitna khawm um a tih, khawm chu suol a nih, hril a ni ngai meu nawh.

Sawrkar thawkna nei mani sina fe lo khawm suol a nih, a suol zie hril a ni ngai meu nawa, a thaw hlak hai chun mani inthiem fawmin an inhrilhlip a, tangka an pekdawk rawn lem chun lawm an hlaw zek nawk nghal. Thamna tangka mi hriet loa lak chu a suol bek bek naw bawk a, insung inrelbawlna kawnga țangkai taka hmang a ni lem chun a hlawk zuol hle.

BPL bufai hlak chu a neinung haiin an chang zing bawk. Job card ei ti leh a sawrkar sin nei hai khawma an nei ve zing bawk. Dan bawsietna suol ei ti tak hi, ei ta dinga hlawkna an tlun phawt chun chungtieng malsawmna anga ei inlet el hlak a hawi ta ngei maw. A sapțawng takin "if it fits our agenda" ti ang takin, ei ta dinga hlawkna le țhatna an tlun phawt chun a suol naw vawng a ni el annaw! Mi rethei le pasie hai chan ding, danin a phal naw hre kur a inru pektu hi ei va tam de aw. 

Ei chengna ram CCPur district hi mihriem le motor a pung nasa hle a, motor nei ei tam taa. Naupang le upa in ei nuom dan sengin motor ei khal a, kum tlinglo ei nau - tu le te hai chen motor ei inkhal tira ei lawma ei innui vur vur. Dan ei bawsiet khawma suol thaw ei ni zie in hriet ei tum der nawh. Ei bengvar naw lei am zu a ni naw leia dan bawsietna hi suola ei ngai naw lem?

Motor Vehicle Act 2019 dungzui chun - motor khal laia Mobile Phone hmang chu dan bawsetu niin salam in tangka Rs. 100 a chawi ding a ni a. A khal laia Mobile Phone a hmang el bakah harsatna annawleh țium an tlun belsa chun a khaltu chu dan bawsetu niin salam Rs. 1,000 annawleh compounding fee Rs. 500 a chawi ding a nih.

Motor khal malama phone thaw hi ei tam em em, a țium zie le sietna an tlun nasa thei zie ei uksak der nawh. A pawimaw hle a ni chun mani motor khal lai lamsir a suk châwl a, phone chu la hmet annawleh mi le la'n biek el ding a nih. Phone thaw/hmet malama motor I khal zat khan nang chau ni loin, mihriem dang hai hringna țium le derthawng takin i sie zie ti na a ni a. Mi hai hringna derthawng taka sie a ni el bakah, dan bawsetu I ni zie ti na a ni bawk a. Chu umzie chu, ringtu țha tak dan bawsie zing zing hlaktu in ei țhang thei ti na a ni chu. Chu chu a kakhawk a ni a, dan bawsie a suol thawtu ei nih ti ei in man tum der naw el hi a mak ka tih! 

Rev. HP Runremthang in lekhabu "A bulah kir nawk ei tiu" ti a zieknaa chun, "Kohran nun a țhat ang bawka khawtlâng nun a țha pha leh, 'inthlakthlengna' (reformation) indik tak a tlung hlak a nih" tiin a lo ziek a. Kohran nun ei ngai pawimaw angin, khawtlâng le lampuia ei nundan hai khawm hi ngai pawimaw a va țul de.

Suol ei ti bik le ei ti rak naw deu hi a um a, an khina hmangruoa ei hmang hai hi a ieng hmangruo tak am a ni ding. Thei nisien chu, suol ei inkhina hi an ang hmang tlang seng thei inla chu nuom a um ka tih. Chuong a suol inkhina hmangruo inang ei hmang seng chun, a suol bik le a fel bik ei inthlierhran naw deu pha khawm ring a um. Amiruokchu, ei innghil naw dinga țha chu, a chin khawma a lien khawma, inhawi ti na le hlimna mi'n tluntu a lo ni khawma, suol chu suol ni zing hlak a tih.

Zu le inruithei thil thaw hlak hai suol bik hlea ei ngai zing laiin, a sun le zana dan bawsie a, suol thawtu ei lo ni ve zing thei annawm unau!

Chuleiin, suol simin motor khal puma phone thaw lo bansan ta rawh. Zu dawn chau hi suol a ni nawh. A bulah kir nâwk ei tiu!

Dâwrkâwn - Dec 7, 2021